Жыхары Першамайскага раёна Мінска пачынаюць кампанію абароны Севастопальскага парку. Ініцыятары правядзення мясцовага рэферэндуму ў абарону Севастопальскага парку пачалі збор подпісаў.
27 лістапада ў парку адбыўся першы сход жыхароў мікрараёна Усход-2, размешчанага на тэрыторыі Першамайскага раёна сталіцы. У ім узялі ўдзел каля 70 чалавек.
Як расказаў прысутным ініцыятар рэферэндуму, кіраўнік ініцыятыўнай групы па стварэнні ГА «Еўрапейская перспектыва» Віктар Янчурэвіч, згодна з генпланам Мінска да 2030 г. праз Севастопальскі парк плануецца правесці дарогу. А згодна з дэталёвым планам рэканструкцыі парку тут плануецца пабудаваць рэстаран, паркінгі, грамадскую прыбіральню і жылыя дамы. Улады збіраюцца высякаць дрэвы, падкрэсліў Янчурэвіч.
«Нам не варта чакаць, калі сюды прыйдуць з піламі і сякерамі, — заявіў ён. — Мы гатовыя будзем абараняць свой парк, нават кладучыся пад бульдозеры, аднак ёсць цывілізаваны шлях — гэта правядзенне раённага рэферэндуму».
Паводле Янчурэвіча, для правядзення такога рэферэндуму трэба стварыць ініцыятыўную групу ў складзе прыкладна 50 чалавек і афіцыйна яе зарэгістраваць, пасля чаго можна будзе збіраць подпісы грамадзянаў. Ён адзначыў, што для рэферэндуму трэба сабраць 15–16 тыс. подпісаў.
Жыхары раёна падтрымалі гэтую ініцыятыву і пачалі фармаваць групу. Адзін з удзельнікаў сходу заявіў, што гатовы сабраць як мінімум 100 подпісаў.
Як паведаміў Віктар Янчурэвіч, аналагічны сход плануецца правесці і ў іншых мікрараёнах Першамайскага раёна. Міліцыя не перашкаджала правядзенню сходу абаронцаў парку, нягледзячы на афіцыйнае папярэджанне, якое Янчурэвіч атрымаў 24 лістапада ад Першамайскага РУУС.
Барацьба жыхароў мікрараёна Усход-2 супраць планаў гарадскіх уладаў наконт рэканструкцыі Севастопальскага парку вядзецца з 1995 г.